LUGO. Cada día máis lucenses deciden cambiar os cans e gatos por animais exóticos. Hurones, coatíes, mapaches e serpes comezan a ser máis comúns na cidade e moitos son abandonados. Polo menos esa é a información que chegou ao grupo municipal do PP.
Os populares proporán no pleno de febreiro que o Concello firme un convenio coa Protectora de Animais Exóticos (Paexga). Este trato significaría a cesión temporal de locais municipais para impartir formación a escolares, asesorar a donos e a recollida destas criaturas.
Un dos puntos que máis interesaría é un local agora baleiro no parque Rosalía de Castro pola súa «proximidade aos colexios», explicou o presidente de Paexga, Eduardo Rodríguez. Un labor moi importante sería explicar aos mozos os problemas derivados de ter un animal exótico e conciencialos a nivel ambiental, xa que algunhas son especies invasoras.
Rodríguez insistiu en que o centro de recuperación de fauna silvestre de O Veral, administrado pola Xunta, está adaptado á recollida de animais autóctonos. Por iso é importante contar con expertos en especies como tarántulas ou xerbos.
«Estamos en contactos con zoolóxicos e granxas-escolas», comentou o presidente. A protectora tenta distribuír daquela os animais recolleitos a calquera destes centros. Esta dinánica busca atallar o gran número de animais exóticos que son abandonados.
