O portavoz do Partido Popular, Antonio Ameijide, presentou este mércores unha denuncia para "pór en coñecemento do xulgado a situación dos máis de vinte contratos caducados que ten o Concello de Lugo". Acompañado por outros compañeiros do grupo municipal, o edil popular asegurou que o seu grupo dá este paso "por responsabilidade", logo de esgotar todas as vías administrativas e políticas que tiña "ao seu alcance" durante os "tres últimos anos" para corrixir esta situación.
Desde o seu punto de vista, o goberno local podería estar a incorrer "nun posible delito de prevaricación e malversación de caudais públicos". Pensa que "existen indicios máis que suficientes para abrir dilixencias para aclarar esta situación", porque a "alcaldesa non pode alegar descoñecemento" neste caso, tendo en conta que a corporación municipal aprobou "acordos en pleno" para instar o goberno local a licitar "os contratos caducados".
"Fixéronse denuncias e advertencias, tanto públicas como privadas, ao goberno socialista, e ata os funcionarios lle advertiron, de forma reiterada e en diferentes informes, dos problemas de bloquear estas licitacións".
Ameijide dixo que presentar esta denuncia é "unha decisión dura, responsable e meditada", consultada coa "asesoría xurídica e as diferentes instancias do partido, a nivel local, provincial e autonómico".
