Elena Candia líder da oposición municipal, presentou este luns o boletín dixital Contigo Lugo, que definiu como unha ferramenta para facer chegar aos militantes do PP e ao conxunto dos lucenses o seu labor no Concello de Lugo.
O obxectivo é reforzar a conexión cos cidadáns, apuntou a portavoz do PP no Concello, que avanzou que o boletín terá carácter periódico e incluirá tres seccións fixas: un balance das principais propostas presentadas ao pleno municipal cada mes, información sobre as propostas do partido para afrontar os problemas de Lugo e tamén imaxes das visitas aos barrios e parroquias dos edís do grupo popular.
Candia engadiu que se trata tamén de avanzar no compromiso de transparencia e rendición de contas e a promesa de seguir na rúa e escoitar aos lucenses.
No primeiro número do boletín inclúese tamén unha análise realizada por Elena Candia sobre os primeiros cen días de goberno municipal.
