O portavoz municipal do PP, Ramón Carballo, asegura que o gasto anual dun pub en rede de sumidoiros, auga e lixo supera a axuda económica do Plan Reanima, sostido con fondos municipais. Segundo as contas dos populares, un establecemento do lecer nocturno gasta anualmente entre 457 e 1.320 euros ao ano nestes conceptos, dependendo da súa superficie, o que, en moito casos, supera a axuda económica que poida cobrar do Concello.
Ante esta situación, o PP presentará unha iniciativa cun plan de medidas para apoiar á hostalería, a distribución, o pequeno comercio e outras actividades que acrediten perdas como consecuencia da pandemia.
Neste sentido, Carballo pide que se reduza -proporcionalmente á vez que estivo o establecemento pechado- a taxa de lixo, auga e rede de sumidoiros á hostalería. "Queremos que non se lles cobre a parte proporcional da cota dos días que pechen, tanto por decreto como se teñen que baixar a persiana por un positivo de covid que obrigue ao peche do negocio", indica.
O PP solicita, ademais, prolongar a exención do pago de terrazas durante 2021 ou bonificar o IBI a este sector.
Carballo tamén recorda que unha das prioridades do grupo municipal do PP é a creación dun fondo covid-19, por cinco millóns de euros que proporcione axudas directas para pagar seguros sociais, gastos fixos ou préstamos a aqueles establecementos con máis dun 50 por cento de perdas económicas.
Outra petición dos populares é activar a Mesa de Comercio Local xa que, din, "é imprescindible definir conxuntamente accións de face ao Nadal".
