Os senadores do PP pola provincia de Lugo demandaron ao Ministerio de Transportes que dean cumprimento ao acordo unánime do Congreso de hai catro anos para levar a cabo a rehabilitación da A-6 entre as provinicias de Lugo e León.
Nun comunicado, os senadores José Manuel Barreiro, Rosa Arza e Manuel Varela incidiron en que o tramo que transcorre entre os quilómetros 407 e 480 presentan problemas que "afectan os vehículos desde hai anos, pero se agravaron nos últimos tempos debidos ás intensas choivas".
Os representantes do PP na Cámara alta advirten que "xa hai tempo que é imposible circular a 120 quilómetros hora" pola autovía. A iso, continúan, súmanse os danos que causaron as choivas das últimas semanas, por exemplo, no túnel de Neira de Rei e na saída a Baralla e Baleira, zonas que "están absolutamente impracticables".
Así, advirten que as actuacións que a Dirección Xeral de Estradas prevé realizar sobre o firme unha vez melloren as condicións meteorolóxicas serán "un parche máis", xa que consideran que o necesario é unha rehabilitación integral entre os quilómetros 407 e 480.
