O barrio de A Cheda volveu sufrir unha avaría na rede da subministración de auga, a segunda en tres días e que provocou cortes de auga en varias rúas do barrio, unha situación que xa se produciu hai varios meses.
Operarios dunha empresa contratada polo Concello desprazáronse ata a rúa Río Masma para iniciar o arranxo da avaría, que quedou reparada ás 18.00 horas, segundo confirmaron fontes municipais, aínda que o PP denunciaba a "falta de operatividade do goberno local para reparar as avarías de auga que se repiten na cidade".
Os populares consideran que a "privatización" do servizo municipal para o arranxo urxente de avarías "non soluciona de forma áxil os problemas que se derivan dos rebentóns nas tubaxes". Ademais, recordaron que, antes de acudir a empresa contratada, foron os traballadores municipais os que cortaron a auga e colocaron unha billa para dar un mínimo servizo á veciñanza.
O PP tamén critica que o goberno local, "logo de desmantelar a brigada de augas, agora esfórzase en apartar ao persoal do Concello ao que lle debe desde o ano 2016 as gardas que fan".