O portavoz do grupo municipal do PP, Ramón Carballo, cargou de novo contra a decisión do Concello de ordenar o peche do aparcadoiro Ánxel Fole sen achegar alternativas. Neste sentido, instou os responsables municipais a buscar "opcións legais para evitar o peche do aparcadoiro", recalcando que "tanto na Lei do Solo de Galicia, no seu regulamento, no PXOM e no Pepri hai ferramentas e argumentos que permitirían manter aberto este aparcamento".
Carballo reuniuse este martes con representantes de asociacións veciñais, de comerciantes e de empresarios de hostalería para trasladarlles a súa proposta de que se cren aparcadoiros disuasorios en varios solares próximos ao centro, chegando a acordos de cesión cos seus propietarios.
O portavoz popular lamentou que "o bigoberno de Lugo no canto de impulsar iniciativas para revitalizar o centro estea dándolle outra nova estocada aos pequenos comerciantes e hostaleiros que son o principal motor económico do centro histórico". Ademais, reclamou á alcaldesa, Lara Méndez, que tome cartas no asunto "e deixe de mirar para outro lado. Queremos saber por que permite ao seu socio -en referencia a Rubén Arroxo- asinar o decreto de peche do maior aparcadoiro de Lugo sen ter previstas alternativas para dar servizo aos que se achegan ao centro".
Arroxo replica que el está obrigado, como responsable de Policía, a executar a orde de peche porque senón estaría prevaricando
Non obtivo, con todo, a resposta da alcaldesa, pero si a de Rubén Arroxo. O tenente de alcalde replicou que o que lle pide o PP é tanto como prevaricar, "e nós non imos prevaricar. Eu non levo urbanismo, senón Policía. E se dende urbanismo chega un expediente finalizado que di que o aparcadoiro é ilegal, eu, que levo Policía, teño que asinar o decreto para non prevaricar, aínda que non me guste. Hai que cumprir a lei".
Na mesma liña, rexeitou as acusacións que está a recibir pola súa postura en contra do peche cando o BNG estaba na opociíon e engadiu que "nós nunca pedimos que non se pechara, senón que se buscasen alternativas e algunhas das que plantexamos fixéronse, como o aparcadoiro disuasorio de Paradai".
Pola súa banda, a Federación de Asociacións de Veciños tamén se mostrou en contra do peche do aparcadoiro polo prexuízo que pode causar a todos os usuarios, e opinou que o mellor modo de solucionar o problema é que se cre unha comisión de estudo formada polo Concello, a empresa propietaria e a propia federación veciñal. Ademais, esixiu ao Concello que obrigue aos outros tres aparcadoiros do centro a ampliar o espazo das súas prazas.
