O viceportavoz do PP no Concello de Lugo, Enrique Rozas, denunciou o martes que "as deficiencias" en materia de mantemento e limpeza nas dúas piscinas climatizadas das Pedreiras e Frigsa ven agravadas durante o verán coa apertura do exterior neste último emprazamento.
O edil popular atribúe eses problemas a unha "alarmante" falta de persoal, debido a que o mesmo que atende as dúas cubertas ten que facerse cargo no verán da que está ao aire libre.
"En moitas ocasións teñen que deixar ao carón a limpeza ou o mantemento para cubrir a recepción e atender aos usuarios, o que demostra que fai falta máis persoal para cambiar a imaxe que ofrecen as piscinas municipais", explicou este concelleiro.
Enrique Rozas apuntou que como consecuencia os vestiarios e as zonas comúns atópanse "encharcados" e cun aseo que "non é do todo correcto", xa que sostén que o persoal que hai "non dá para máis".
Acusou ao goberno local de "despreocupación" e "falta de control" á hora de previr calquera tipo de incidencia nas piscinas municipais, que dixo que contan en total cuns 1.000 usuarios de media ao día.
Ademais, esixiu que se reparen os teitos dos vestiarios, deteriorados pola condensación; a mellora da iluminación; a reposición de chaves para poder utilizar os despachos de billetes bloqueados; a reparación de tornos para acceso ás instalacións que non funcionan e recuperar o reloxo de adestramento que "está desaparecido".
CONTRATO CADUCADO. O edil do PP recordou que o control de auga e a limpeza periódica das piscinas débense realizar os sete días da semana, segundo recolle o prego de condicións do contrato, o que non se produce, como se desprende das queixas presentadas polos cidadáns na comisión de reclamacións e suxestións.
"Mes si, mes non, chegan denuncias de usuarios que relatan os problemas de hixiene detectados en ambas as dotacións deportivas e a única resposta dada polos socialistas é mirar a outro lado", afirmou.
Enrique Rozas propón ao goberno local que no novo prego de condicións das piscinas municipais, cuxo contrato caducou o mes pasado, se inclúan todas estas necesidades.
