Polas rúas do esquecemento

Se Enrique Urquijo compuxese en Lugo La calle del olvido, o tema que popularizou o seu grupo Los Secretos, tería que ser moito máis preciso. "¿Cal de todas?", púidolle preguntar calquera lucense ante a cantidade de rúas que ou ben parecen esquecidas por todos polo aspecto que presentan ou ben, directamente, nin sequera existen de xeito oficial.

Este último é o caso do tramo asfaltado que se creou de xeito ilegal hai uns anos, tantos que xa case se esqueceu, para unir as rúas Flor de Toxo e Monte de Cadramón, nas proximidades da gasolineira de Avenida da Coruña. O único que se acorda del parece ser o concelleiro de Ciudadanos Juan Vidal Pardo, que este mércores reclamou unha solución para esta vía que nin aparece no rueiro.

Vidal Pardo recordou que a presión exercida "polos veciños da zona en 2014" serviu para que o entón goberno socialista anunciase "a súa intención de eliminar dita vía. De feito estimouse un recurso do propietario da leira afectada no que se recoñecía unha ocupación ilegal da propiedade. Cinco anos despois deste anuncio, o Concello non levou a cabo ningún tipo de acción e o trazado permanece fóra da legalidade", lamentou o concelleiro de Ciudadanos. Para solucionar este esquecemento, propuxo varias fórmulas: "Levantar o asfalto e compensar os afectados ou chegar a un acordo cos propietarios da leira para a cesión do terreo".

A asociación veciñal de Paradai reclama orzamento para arranxar seis rúas co firme en mal estado e sen beirarrúas

Incluso engadiu unha terceira posibilidade que, ao seu xuízo, suporía unha maior seguridade xurídica e maior beneficio para os veciños: "É posible acometer unha modificación do PXOM na que se poida incluír este viario, xa que o solo esta catalogado como urbanizable programado. Con esta solución ordenaríase a zona e permitiríase o seu desenvolvemento", concluíu.

RÚA SEN NOME. Outro barrio cheo de rúas do esquecemento é Paradai. De feito, ata ten unha sen nome, como na canción de U2 Where the streets have no name. A asociación de veciños Alexandre Bóveda refírese a ela como "rúa sen nome que vai de Río Sil a Perpetuo Socorro (Quinta de Pérez)", na listaxe de rúas que presentaron para esixir o seu arranxo. O seu estado é tal que causa "problemas de circulación polo feito de que os firmes estean estragados e falten beirarúas enteiras".

Por iso, reclaman ao Concello que se acorde delas nos orzamentos de 2020. Son seis, catro das cales non teñen beirarrúas e presentan o firme desastrado: Azor, Manuel Murguía (na foto), Río Parga e a aludida "rúa sen nome". No caso da Rúa Alexandre Bóveda, "o bacheado é inadecuado e quedou mais levantado que o firme que o rodea, quedando en forma de montículo". Para rematar, o cruzamento de Rúa Azor con Praza de San Lorenzo tampouco ten beirarrúas.