O pop de Manel encheu este martes a Praza Horta do Seminario, onde o grupo catalán mostrou a súa soltura no escenario e ante un público que adoita ter no peto de antemán. Hai un estilo Manel e quen vai aos seus concertos espérao e, sen dúbida, recíbeo.
O cuarteto catalán presentou en Lugo temas do seu último disco, pero tamén fixo un repaso polo resto da súa discografía. Arnau Vallvé, Martí Maymó, Roger Padilla e Guillem Gisbert coñécense desde nenos e iso nótase no escenario, no xeito na que interactuan cando botan a vista atrás na súa discografía. Por Horta do Seminario pasaron os últimos 13 anos de música pop catalá, o tempo que fai que publicaron o seu primeiro disco Els millors professors europeus, que conseguiu un disco de ouro e fíxoos coñecidos e tarareados en Cataluña, Levante e Baleares.
Os integrantes de Manel puxeron o punto e final a un programa de concertos que contou no seu último día cunha interesante mestura de estilos. En Santa María actuaron antes Tanxugueiras, o trío de cantareiras e pandereteiras que aplican as súas influencias musicais en cancións tradicionais e ás que o público apoia rotundamente como representantes de España en Eurovisión.
As Tanxugueiras visitaron Lugo con anterioridade –a última vez este pasado mes de xullo dentro do ciclo Lugocultural– pero o de onte foi un concerto especial. As irmás Olaia e Sabela Maneiro (de Teo) e Aida Tarrío (de Ribeira) teñen unhas voces prodixiosas e unha habilidade coa pandereita froito de empezar a tocala sendo moi pequenas. A estas alturas xa parece unha extensión da súa man. O público de Lugo agradeceulles a súa entrega sobre o escenario. No repertorio non faltou Figa, a canción que os eurofans quixesen que representase a España no próximo certame de música.
Noutro escenario, o da chaira do parque de Frigsa, xunto ao auditorio Gustavo Freire, Galician Army presentou un espectáculo especialmente deseñado para as festas, segundo explicou o DJ integrante do grupo Sergio Vallejo. Durante hora e media, el e Alberto Prado puxeron á xente a bailar, mesturando temas moi coñecidos das décadas dos 80 e 90 con bases de house e piano en directo, nos que deixaron notar as súas influencias, como Vangelis, Daft Punk e Pet Shop Boys.
Ademais, en Horta do Seminario tamén soou, antes do concerto de Manel, o folk de Milesios. O grupo interpreta música galega e irlandesa, que o martes nbsp;estaba de loito coa morte de Paddy Moloney, fundador de The Chieftains
Ademais, Fran López, Nando Brocos e Bubi Vidal, da banda de punk rock Filophobicas estiveron en Santa María dando un concerto vespertino de entrada libre que atraeu aos curiosos, así como aos seguidores.
Lagarto zulú e Banda Bestial foron os encargados dos concertos de mediodía, programados para que a música non parase en todo o día de peche dos festexos. Polas rúas do centro, para pór banda sonora a quen gozaban dun vermú ou viño baixo o sol do mediodía, estiveron A volta do agro, levando a súa música tradicional en pasacalles.
