O Concello procederá nos próximos días ao aceso da iluminación pública do polígono 2 da Louzaneta, unha zona residencial que leva 15 anos pendente de rematarse. O goberno local e os propietarios chegaron a un acordo para que fose o Concello o encargado de executar de forma subsidiaria as obras e instalar todos os servizos públicos.
Os traballos foron contratados en xuño do ano pasado con decembro como data de finalización, pero sufriron varios atrasos, provocados en parte pola entrada en concurso de acredores da empresa adxudicataria e porque foi necesario soterrar a liña eléctrica de media tensión que atravesa o polígono.
O goberno local explica agora que os labores para conectar a iluminación pública á rede xa están finalizados e, unha vez que se asine o contrato coa compañía subministradora de enerxía, procederase á posta en funcionamento da iluminación.
Os propietarios desta urbanización levan anos demandando este servizo, xa que din que a falta de iluminación facilita os roubos. De feito, nalgúns chalés rexistráronse asaltos con residentes dentro do inmoble.
Ademais da conexión da iluminación, as obras executadas polo Concello incluíron a repación das deficiencias relativas ás diferenzas de cota das rúas e a conexión da rede de sumidoiros á rede municipal de saneamento. O Concello repercutirá o gasto, que ascende a 222.000 euros, aos propietarios, que no seu momento xa tiveron que depositar un aval e en novembro pasado xa fixeron fronte a un primeiro pago.
A urbanización da Louzaneta está dividida en tres polígonos e un cuarto en desenvolvemento e a súa finalización provocou preitos entre propietarios e Concello pola legalización das obras e os servizos pendentes.
