A Policía Nacional reinicia este xoves, "de forma gradual e progresiva", o servizo de cita previa para a obtención ou renovación do DNI ou do pasaporte a través da páxina oficial www.citapreviadnie.es. Esta medida entra en vigor en todos aqueles territorios que se atopen na fase 2 do plan de transición cara á nova normalidade, entre os que se atopa a provincia de Lugo.
A Policía recorda que todos os cidadáns deben acudir á súa cita "puntualmente, provistos de máscara, co importe exacto en metálico da taxa —12 euros o DNI e 30 euros o Pasaporte— e de forma individual, salvo para expedicións a menores ou persoas que necesiten acompañamento". Desde a comisaría lucense recordan igualmente que a validez de todos os DNI que caduquen desde a entrada en vigor do estado de alarma o pasado 14 de marzo prorrogarase durante un ano, ata o día 13 de marzo de 2021.
Por outra banda, a Policía Nacional activou este mércores o seu Plan de Actuación fronte ao Covid-19, "para garantir a seguridade na volta á actividade ordinaria". O protocolo inclúe as pautas necesarias para a reincorporación aos centros de traballo e tamén medidas preventivas, como a clasificación das actividades en grupos ou a implantación de medidas específicas para determinadas actuacións policiais, entre outras.
"Con esta actualización", explican, "a Dirección Xeral da Policía axusta aos requirimentos da actual situación as medidas preventivas que ata agora se implantaron. Desta forma, dáse resposta aos novos escenarios expostos".
