O barrio de As Gándaras viviu nas últimas horas un novo intento de ocupación dunha vivenda pechada, que puido ser evitado grazas á rápida intervención dos propietarios e da Policía Nacional, que foron alertados por veciños da zona.
Segundo relata unha das propietarias da vivenda, foron avisados o martes pola noite de que dous homes de entre 20 e 30 anos forzaran a porta traseira da casa, un edificio de dúas plantas situado no número 59 da Calzada das Gándaras. Tras avisar á Policía e acudir á vivenda, comprobaron que os intrusos xa non estaban e que causaran desfeitas no interior.
"Volvemos poñer cadeados pola noite e á mañá seguinte avisáronnos de que xa entrasen de novo, polo que tivemos que ir outra vez, pero xa non estaban", relata a dona da casa, que engade que xa non recorda as veces que nos últimos quince anos sufriron intentos de ocupación desta vivenda, que é unha herdanza e non está acondicionada para vivir, pero que os herdeiros tratan de conservar en bo estado para nun futuro poder rehabilitala.
TAPIADA. A afectada explica que ao ver que a entrada dos okupas repetiuse en só unhas horas, optaron por chamar a un albanel para que tapiase este mesmo mércores as entradas á casa, xa que asegura que resulta un sinvivir o feito de que cada certo tempo teñan que acudir á vivenda a tratar de evitar que sexa ocupada.
Ademais, a dona da vivenda agradeceu o labor da Policía Nacional, que dixo que patrullou durante a noite e a mañá deste mércores a zona, aínda que se lamenta de que os axentes "teñen as mans atadas, porque a lei permite que se poidan okupar as propiedades privadas". Engade que os policías lles dan pautas sobre como teñen que actuar nestes casos, para que a desocupación da casa sexa amigable e evitar así un desafiuzamento que pode tardar varios meses.
