Axentes do Corpo Nacional de Policía (CNP) detiveron a dous mozos, un de 18 anos e outro menor de idade, como sospeitosos dun roubo con violencia perpetrado na cidade de Lugo.
Os feitos ocorreron sobre as 19:30 horas deste xoves, na Praza do Castiñeiro, cando un policía de paisano que pasaba pola zona avisou á Comisaría de que se estaba producindo unha agresión, á vez que intercedía para pór fin á agresión.
Segundo informou a propia vítima aos axentes que se desprazaron ao lugar, achegouse á Praza do Castiñeiro e, desde o coche, preguntoulle a un mozo se sabía de alguén que vendese haxix. Contestoulle que el mesmo, polo que a vítima entregoulle 100 euros, pero ao non recibir a mercancía "comezou a disputa".
O agresor tirouno ao chan e deulle dúas puñadas na cara, pero non puido darlle máis golpes pola intervención do policía de paisano, que os separou.
O diñeiro, supostamente, entregoullo ao menor, que estaba montado nunha bicicleta, pero non puido escapar porque foi localizado polos axentes que se desprazaron ao lugar.
Xa na Comisaría, o menor comezou a insultar aos axentes, intentou abandonar as dependencias oficiais e incluso agrediu a un policía.
Foi detido e posto a disposición da Fiscalía de Menores, mentres que o outro detido pasou a disposición xudicial.
