Axentes da Policía Nacional enviaron este martes, a media mañá, ás súas casas persoal do centro de día para persoas maiores Abrite da capital lucense. Esta é unha medida inaudita, como a crise sanitaria que nos azouta.
As forzas de seguridade adoptárona debido a que os traballadores carecían dos suficientes medios de protección, como máscaras, luvas e xeles desinfectantes, entre outros. Estes materiais requírense para atender este colectivo considerado de risco por mor da declaración do estado de alarma.
O centro de día Abrite, que atendía sete usuarios antes de que se fixasen as restricións que se decretaron con esta urxencia sanitaria, prevé que volverá abrir as súas portas no prazo de 24 horas, unha vez que xa repoña eses materiais dos que carecía.
Esta situación que resulta inusual prodúcese ademais nun momento que é delicado para este establecemento que presta atención sociosanitaria, pois está á venda, tras entrar en liquidación a sociedade que o xestiona. Ao parecer, xa tivo algún pretendente.
O centro está á venda, tras entrar en liquidación a sociedade que o xestiona
O xulgado mercantil de Lugo declaraba o concurso de acredores de Abrite Integración SL en xuño do ano pasado, cando acumulaba un pasivo que por entón roldaba o medio millón de euros.
REIVINDICACIÓN. O pasado luns, cando xa non podía atender usuarios no centro de día debido ás restricións que se estableceron, o persoal dedicouse a realizar labores de desinfección e limpeza.
Os traballadores solicitaron que se puidesen marchar aos seus domicilios para cumprir o confinamento pola falta efectiva de traballo e a carencia dos medios materiais mencionados.
Este centro de día abriu as súas portas hai 17 anos, na primavera de 2003. Atópase na Rúa San Eufrasio. Conta con 92 prazas para persoas maiores e o seu persoal está formado por unha vintena de traballadores. Atendía os seus usuarios de nove da mañá a oito da tarde e contaba con servizo de transporte a domicilio.
Esa demanda prodúcese por mor de que desde o luns están a atender por planta sete auxiliares, cando antes da crise sanitaria estaban cinco. Cren que ese número é suficiente porque non se detectou ningún caso de coronavirus no xeriátrico e o persoal é o único que entra e sae do inmoble, polo que pode entrañar un risco de contaxio para este fráxil colectivo.
Máis protección
Consideran que este reforzo de persoal será apropiado nas próximas semanas, se se rexistra algún caso de infección. Ademais reclaman máis medios de protección, por exemplo máscaras, pois as que están a usar son de usar e tirar.
