A Policía Local de Lugo disolveu na madrugada deste sábado unha nova quedada ilegal no polígono industrial de As Gándaras, a terceira en menos de dous meses, e denunciou un dos condutores participantes por diferentes infraccións en materia de seguridade viaria.
Os axentes foron advertidos da convocatoria desta nova quedada automobilística —que adoitan difundirse a través das redes sociais— e por iso durante a madrugada foron desprazados ata o polígono industrial tres coches patrullas, que realizaron varios controis, tanto de condutores como de turismos.
A intervención saldouse coa citada denuncia e a disolución da convocatoria, ao abandonar o lugar a maioría de vehículos.
