A Policía Local incrementou a vixilancia na contorna do Hospital Universitario Lucus Augusti e estableceu varios dispositivos especiais para combater a actividade dos gorrillas. Segundo explicou este mércores o portavoz do corpo, os controis realizáronse durante dous días consecutivos e saldáronse con sete homes denunciados.
Os operativos policiais levaron a cabo a semana pasada —concretamente os días 17 e 18— nas inmediacións do Hula e dos aparcadoiros próximos, onde adoitan situarse os gorrillas para esixir diñeiro aos traballadores e usuarios do centro hospitalario que buscan estacionamento. Os efectivos da Unidade Territorial de Policía de Barrio percorreron a zona en vehículos camuflados para evitar que os infractores se desen á fuga ao detectar a súa presenza e detectaron a sete homes en plena actividade ilegal.
"Os axentes", sinalou o portavoz policial, "sorprenderon sete persoas realizando dita práctica na calzada, indicando os estacionamentos libres aos condutores. Deste xeito, puñan en risco a súa integridade física e ocasionaban molestias e prexuízos aos usuarios da vía". A Policía Local denunciou os aparcacoches ilegais por infracción á Ordenanza de Circulación e á normativa de Seguridade Viaria e propuxo unha sanción de 200 euros para cada un deles.
A actividade dos gorrillas xera multitude de queixas cidadás desde hai xa varios anos e os afectados consideran que as sancións económicas que lles impoñen "non serven" para atallar o problema, xa que a maior parte das persoas denunciadas por exercer esta actividade son insolventes e non chegan xamais a pagar a multa.
Os cidadáns afectados pola actividade piden regularmente ao Concello que cre os mecanismos necesarios para que a Policía Local poida actuar contra os gorrillas dun modo "máis contundente" e atallar dunha vez unha problemática que os afectados vinculan ademais a outros feitos delituosos, como os roubos no interior de turismos cerca do hospital.
