Un policía local fóra de servizo frustra un roubo en dúas casas de Santiago de Saa, no municipio de Lugo. O axente circulaba no seu turismo pola parroquia de Cuíña cando se cruzou cunha furgoneta que levaba a matrícula tapada cun anaco de tea de cor negra.
O policía local, que alertou os seus compañeiros de servizo, dá a volta e inicia entón un seguimento. Ve que a furgoneta se mete nun camiño de terra e vixía a distancia os seus movementos.
O condutor da furgoneta ao decatarse de que alguén o está vixiando vólvese poñer en marcha a toda velocidade e ao pasar por diante dunha casa alerta a dúas persoas que saen correndo, métense no vehículo e foxen. O axente identificou o condutor por intervencións policiais anteriores.
Cando acudiron patrullas, comprobaron que as portas dunha vivenda unifamiliar de nova construción e doutra antiga estaban forzadas. Na parcela había tiradas no chan varias ferramentas que ao parecer abandonaron os ladróns ao ver frustrado o seu roubo.