Efectivos do Grupo Operativo Nocturno da Policía Local de Lugo disolveron ao longo da fin de semana dúas festas xuvenís que se levaban a cabo nun piso da Avenida de Madrid e nun baixo dun edificio da rúa San Roque.
Na primeira intervención, ás 1.30 horas, os axentes detectaron a oito persoas non conviventes, que foron denunciadas por infracción á Lei Orgánica de Protección da Seguridade Cidadá, con multas de 601 a 30.000 euros.
Na segunda festa, ás 2.20 horas, a Policía observou a dez mozos non conviventes no interior do baixo. Segundo explicou o portavoz policial, os asistentes montaran unha mesa para as bebidas cun equipo de música e altofalantes. Todos eles foron denunciados. Os axentes acudiron a estes lugares polas denuncias dos veciños "debido ao ruído que proviña do seu interior e que imposibilitaba o descanso".
Así mesmo, 17 persoas que se achaban nestas festas saíron dos inmobles e transitaron, sen xustificación algunha, pola vía pública a partir das once da noite, polo que tamén foron denunciadas, por infracción á Lei Orgánica de Protección da Seguridade Cidadá, con multa de 601 a 30.000 euros.
Desde a Policía Local de Lugo recordan que, desde as doce da noite do pasado día 4 "existe unha limitación de permanencia de grupos de persoas en espazos públicos ou privados non superior a 4 persoas, agás que se trate de persoas convivientes e no caso de agrupacións en que se inclúan tanto persoas convivientes como non convivientes, o número máximo será tamén de 4 persoas". Así mesmo, "mantense a prohibición de circular pola vía pública entre as 23.00 e as 6.00 horas, sen acharse incluído en ningunha das causas de excepción que establece a normativa en vigor", conclúen.
