A Policía Local de Lugo continúa realizando a diario labores de vixilancia na contorna do Hospital Universitario Lucus Augusti, para disuadir aos gorrillas, e na mañá do mércores denunciou a sete persoas por realizar este tipo de condutas.
Os axentes estableceron un dispositivo especial e percorreron a zona en vehículos camuflados, sancionando a sete aparcacoches ilegais por infraccións á Ordenanza de Circulación, ao Regulamento Xeral de Circulación e á Lei de Seguridade Cidadá, xa que estas persoas invadían a calzada para indicar estacionamentos a condutores, "ocasionando molestias e pondo en risco a súa integridade física".
A Sala do 092 recibe numerosas chamadas de cidadáns que se queixan da actividade que levan a cabo os gorrillas, todos eles reincidentes, polo que a Policía Local vixía continuamente a contorna do Hula. Con todo, os cidadáns consideran que as sancións non resultan efectivas e instan o Concello a tomar medidas "máis drásticas" para evitar estas condutas.
