A Policía Local non baixa a garda e continúa organizando dispositivos de vixilancia na contorna do Hula para poñer couto á actividade dos gorrillas. Os axentes percorreron na mañá do mércores os arredores do centro hospitalario e denunciaron seis aparcacoches ilegais.
Os axentes sorprenderon seis persoas realizando dita práctica na calzada, indicando os estacionamentos libres aos condutores. Deste xeito, puñan en risco a súa integridade física e ocasionaban molestias e prexuízos aos usuarios da vía. A Policía Local denunciou os aparcacoches ilegais por infracción á Ordenanza de Circulación e á normativa de Seguridade Viaria e propuxo unha sanción de 200 euros para cada un deles.
A Policía Local recibe a miúdo chamadas de cidadáns que mostran as súas queixas polas ameazas que reciben dos gorrillas, pero poucos formalizan a denuncia.
