Axentes da Policía Local de Lugo auxiliaron a unha muller de 66 anos que estaba sentada nun banco dos xardíns da rúa Ramón Montenegro, sobre as oito e cuarto da mañá do xoves, tiritando de frío e totalmente desorientada. A muller díxolles aos axentes que era dunha localidade de Asturias e que non se acordaba de como chegara á cidade de Lugo.
Os axentes cubriron á sesaxenaria cunha peza para tratar de darlle calor e solicitaron unha ambulancia do 061, que a trasladou ao Hula. A Policía Local abriu unha investigación para tratar de localizar aos seus familiares e comprobou que non constaba ningunha denuncia por desaparición.
Ese mesmo día, sobre as once e media da noite, unha patrulla do Grupo Operativo Nocturno da Unidade Territorial de Policía de Barrio da Policía auxiliou a outro home, de 71 anos, que se atopaba en estado de embriaguez e caeu nunha beirarrúa de Camiño Real, producíndose feridas na cabeza. Os axentes practicáronlle os primeiros auxilios e tamén solicitaron unha ambulancia para trasladalo a un centro hospitalario.
