A Policía Local de Lugo levantou acta de sanción na noite do xoves ao venres a dous lucenses porque non deixaban conciliar o soño aos seus veciños debido ao elevado volume ao que tiñan a música nos seus domicilios. Os axentes que interviñeron puideron comprobar en ambos os casos que o ruído xa se ouvía desde a rúa.
Unha desas condutas incívicas foi ás once e dez da noite do xoves nun piso da Rúa Otero Pedrayo, onde xunto á molestia da música rexistrábase "un ton excesivamente alto de voz humana", segundo o informe da Policía Local. A outra foi á unha e dez da madrugada deste venres na Rúa Frai Plácido.
A Policía Local levantou ademais entre o mércores e o xoves 12 actas de infracción da Lei de Seguridade Cidadá por incumprir o confinamento.
