Os suicidios, un problema de saúde pública que en Lugo ten especial incidencia, continúa sendo unha secuela. A falta de protocolos de prevención agudizan esta problemática que segue deixando casos semana tras semana, aínda que algúns se poidan evitar.
Sen ir máis lonxe, os axentes da Policía Nacional de Lugo frustraron en 24 horas dous intentos de suicidio na capital lucense, ambos de persoas de mediana idade.
No primeiro dos casos, un amigo do home que se quería quitar a vida alertou ao 091 tras recibir unha mensaxe na que o seu coñecido lle comunicaba que se ía a tirar da ponte nova.
De xeito inmediato os funcionarios do servizo de Radiopatrullas de noite dirixíronse ao lugar, onde o home, duns corenta e cinco anos, trataba de empolicarse á varanda da ponte sobre o río Miño. Os axentes puideron agarralo antes de que saltase. Os servizos médicos, vitais nestes casos, atendérono no lugar antes de trasladalo ao Hula.
SEGUNDO CASO. A Policía tamén informa doutro suicidio que, por fortuna, se puido evitar: o dun home de 40 anos. Os axentes foron informados de que non acudira ao posto de traballo nin a recoller aos seus fillos ao colexio. Tamén se lles advertiu de que tivera antecedentes psiquiátricos.
Un dispositivo de procura, coordinado desde o grupo encargado da localización das persoas desaparecidas e do coordinador de servizos da Brigada de Seguridade Cidadá, logrou localizalo no seu domicilio.
Horas despois, este home viaxou en coche ata un lugar do sur da provincia e, ante os seus antecedentes, iniciouse outra vez a súa procura. A Garda Civil puido localizalo e, tras ser atendido polos servizos médicos, foi trasladado ao Hospital de Monforte para a súa valoración.
