O Corpo Nacional de Policía (CNP) informou de que non lle consta que na cidade de Lugo estean a actuar nestes momentos mafias organizadas que utilicen a ocupación ilegal de vivendas como método para extorsionar aos propietarios deses inmobles.
O subinspector Manolo Arias, portavoz da Policía de Nacional en Lugo, precisou a EFE que non se detectaron na cidade casos de ocupación de vivendas usadas polos seus propietarios, nin sequera de segundas residencias.
A maioría das actuacións producíronse pola ocupación de inmobles abandonados por parte de familias en risco de exclusión socialpersoas que, cando son desaloxadas, buscan outra casa para meterse.
De feito, unha das últimas denuncias realizadas na cidade sobre a suposta ocupación ilegal dunha vivenda, que os seus propietarios deixaran baleira a causa do confinamento -porque se foron a vivir cuns familiares-, foi en realidade un caso de roubo con forza que acabou con varias persoas detidas.
Por outra banda, tanto a alcaldesa de Lugo, Lara Méndez, como a subdelegada do Goberno, Isabel Rodríguez, aseguraron logo de manter unha reunión de traballo coas policías Local e Nacional que o número de vivendas ocupadas ilegalmente no municipio non se corresponde en absoluto coa "alarma social creada".
Segundo explicou o propio goberno local, logo desa reunión, a Policía Nacional só ten constancia da ocupación de seis inmobles na cidade de Lugo e son, ademais, casas abandonadas.
De feito, tanto a alcaldesa como a subdelegada, aclararon que eses inmobles non son, en ningún caso, "nin primeiras nin segundas vivendas" de particulares, así como que os seus ocupantes son "persoas en risco de exclusión social".
Por iso, logo de analizar a situación do municipio cos mandos policiais, ambas coincidiron en pedir que "non se infunda temor entre a poboación", porque "as cifras de ocupación" non xustifican a "alarma social xerada".
De feito, Isabel Rodríguez comentou que tampouco "aumentou" o número de altercados na cidade e que Lugo "segue sendo un dos municipios máis seguros de Galicia e de España".
Por outra banda, Lara Méndez anunciou que lle solicitará á Xunta "maior implicación en políticas de vivenda pública en Lugo", porque hai "un milleiro de demandantes" e preocúpalle que "aumenten coa crise económica".
