Un mozo, de 28 anos de idade, foi detido na capital lucense por axentes da Policía Nacional acusado de dous delitos de estafa na compravenda de bitcoins, unha moeda electrónica á que se recorre para realizar transaccións a priori dunha forma segura.
O arrestado, que carecía de antecedentes, actuaba como intermediario entre os afectados e unha rede de estafadores. Esta fíxose co diñeiro, a través dun método coñecido como pishing, unha técnica onde mediante o engano gáñase a confianza da vítima suplantando a unha persoa ou empresa que lle xera confianza para obter os seus datos bancarios e persoais.
A investigación foi levada a cabo pola Unidade de Delincuencia Especializada e Violenta (Udev) da Policía Nacional de Lugo. Os feitos foron denunciados en Castelló e Pamplona, onde residen as vítimas, que sufriron unha estafa de 600 e case 4.000 euros, respectivamente.
O mozo presuntamente encargábase, a través dunha plataforma online, de intentar dificultar ás forzas da orde o rastrexo dese diñeiro estafado mediante a compravenda de bitcoins.
A un veciño de Pamplona estafáronlle case 4.000 euros e a outro de Castelló 600
As vítimas, unha vez que foron convencidos pola trama, ingresaron esas sumas de diñeiro para recibir a cambio a moeda electrónica.
Nesta ocasión, logo de realizar os respectivos ingresos non lles foi devolta a cantidade correspondente en bitcoins, co que logo de comprobar nas súas entidades bancarias que lles había detraído o diñeiro, pero non lles ingresaron o produto adquirido, procederon a interpor as denuncias nas comisarías de localidades nas que residen.
A operación trasladouse á comisaría da capital lucense ao seguir a pista do diñeiro. Os axentes detiveron a este mozo de 28 anos e puxérono a disposición xudicial.
O mozo non só foi detido, senón que tamén se tivo que rascar diñeiro do seu peto. Como unha entidade bancaria observou irregularidades na transacción, conxelou o abono do diñeiro, polo que o detido tivo que facer fronte ao pago dos case 4.000 euros que a rede pretendía estafar ao veciño de Pamplona.