Axentes da Policía Nacional de Lugo desarticularon un punto de venda de heroína no Sagrado Corazón e detiveron ao traficante, duns 50 anos, resolvendo así unha situación que mantiña en albas á veciñanza.
De feito, foron os propios residentes quen deron a voz de alarma a finais do pasado mes de agosto, cando denunciaron en comisaría que o barrio se converteu nun continuo ir e vir de toxicómanos. Ademais, describiron "dun xeito moi eficaz" á persoa que supostamente fornecía a droga aos compradores, segundo a Policía.
Tras recibir estas queixas, a Policía Nacional abriu unha investigación. Segundo explicou este mércores o portavoz policial, "o delegado de participación cidadá acudiu ao barrio para comunicar aos veciños, comerciantes e asociacións da zona que os axentes estaban a traballar para comprobar os feitos e darlle unha solución ao problema". Ademais, axentes do Grupo I da Policía Xudicial realizaron diversas vixilancias e comprobaron que os veciños estaban no certo nas súas sospeitas.
Os policías puideron comprobar que un home vendía a droga nas inmediacións da rotonda do Sagrado Corazón, así como en Camiño de Frías e en ocasións tamén na zona do paseo do Rato
Os consumidores xuntábanse para acudir ao barrio en grupo, a bordo de varios coches, e posteriormente desprazábanse nos arredores da cidade e consumían a droga en zonas despobladas e escampados. "Os consumidores", explicou o portavoz da Policía Nacional, "acudían ao barrio en ocasións a pé, aínda que o máis habitual era que fosen a bordo de vehículos, denominados cundas". Con este nome denomínase aos coñecidos como taxis da droga, xa que os condutores levan aos toxicómanos a adquirir a heroína cambio de diñeiro ou a cambio de consumir tamén droga de forma gratuíta.
A Policía Nacional detivo ao traficante, un home ao que lle constan polo menos 18 arrestos anteriores e conta ademais con "innumerables" antecedentes penais, apuntou a Policía.
