A Policía Local de Lugo desaloxou na madrugada do día 4 un local de hostalería da Rúa Salvador de Madariaga no que se celebraba unha festa.
Os axentes acudiron alertados polos veciños, que denunciaron a existencia dunha pelexa na rúa e xente no interior do establecemento fora do horario permitido.
Ao chegar ao lugar, os policías atoparon a porta pechada e escoitaron voces de varias persoas en actitude festiva no interior do local. Tras chamar repetidamente, abriulles o propietario do establecemento, quen lles indicou que había tres persoas realizando labores de limpeza e inventario.
Os axentes entraron para comprobalo e observaron un bolso de muller sobre a barra e vasos con bebidas nas mesas. Ao inspeccionar o local atoparon a dous homes escondidos nos baños e a outras dúas persoas na cociña. Identificáronos a todos e propuxéronos para sancións por infracción da Lei de Saúde de Galicia.
O dono do establecemento tamén se enfronta a varias sancións por diversas infraccións graves relacionadas coa citada lei.
Tras a intervención, a Policía Local desaloxou e pechou o establecemento.
DROGAS. A Policía Local de Lugo localizou tamén o luns, 5 de abril, a dúas persoas en posesión de drogas. A primeira foi un condutor que circulaba pola Rúa Santo Graal sen cinto de seguridade. Cando os axentes lle deron o alto, arroxou pola ventá do coche un cigarro de haxix.
Foi sometido ao test de drogas e arroxou resultado positivo, polo que foi denunciado por conducir con drogas no organismo e abríuselle un expediente sancionador, con multa de 1.000 euros e retirada de seis puntos do permiso de conducir. Por ir sen cinto de seguridade, afrontará unha sanción de 200 euros e a retirada doutros tres puntos do carné. A Policía remitirá tamén unha denuncia á Subdelegación do Goberno por tenencia de estupefacientes.
O outro home sorprendido con drogas foi detectado na Rúa Lambas de Prado, ás 3.30 horas da madrugada. Ao decatarse da presenza dos axentes, fuxiu correndo, pero foi interceptado na Rúa Serra de Outes cunha bolsa de marihuana e un cigarro leado.
Os axentes interviñeron a marihuana e levantaron acta de infracción da Lei Orgánica de Protección de Seguridade Cidadá. O home enfróntase tamén a unha proposta de multa de 500 euros por transitar en horario detoque de queda sen causa xustificada.
QUEBRANTAMENTO. Tamén por este mesmo motivo foi denunciado outro home que foi localizado ás 0.20 horas do día 4 transitando pola vía pública sen causa xustificada. Ao ser preguntado polos axentes, manifestou que saíra pasear o
Esta persoa, ademais, ten orde xudicial de localización permanente no seu domicilio, polo que tamén está acusado dun delito de quebrantamento de condena.
