O atraso no aceso da iluminación de Nadal na capital lucense, que non se producirá ata mediados de mes, como moi cedo, provocou as críticas do colectivo Lugo Monumental, que agrupa aos negocios do centro histórico, porque o cualifica como "un torpedo na liña de flotación do comercio".
Segundo esa asociación, "entrar a estas alturas no debate sobre a utilidade das luces do Nadal é incomprensible", cando "todos os estudos e análises" levan "á mesma conclusión", que "crean un ambiente propicio, que fomenta a afluencia de público e, polo tanto, as compras do Nadal".
Precisa, ademais, mediante un comunicado, que non se trata de fomentar o consumo, senón de onde se produce ese consumo", porque "os grandes centros comerciais" hai xa semanas que locen "as súas decoracións festivas".
"É evidente que non o fan por xenerosidade, senón porque saben de certo que é un elemento crítico para o éxito da campaña comercial de Nadal".
O goberno local, pola súa banda, culpa desta situación ao atraso na aprobación do orzamento para este ano. "Imos ter iluminación do Nadal antes das festas. Unha iluminación moito máis completa e bonita que en anos anteriores e esperamos que todos os lucenses a gocemos", dixo a edila de Economía, Ana Prieto.
"Imos ter unhas luces de Nadal bonitas, espectaculares, diferentes e que apostan pola sensibilidade ambiental"
A responsable de Economía asegurou que o goberno local e os servizos técnicos están a traballar para "apurar os prazos" e ter a iluminación instalada "no tempo máis curto posible", pero recordou que o atraso na aprobación do orzamento municipal, que finalmente se produciu en abril, provocou "un atraso na tramitación de todos os expedientes no Concello".
"A oposición non levantou a man para dar o seu apoio a eses orzamentos", dixo Ana Prieto, quen asegurou que desde o Concello está a traballarse ao "150 ou 200 por cento" para "facer os trámites no menor tempo posible".
"Imos ter unhas luces de Nadal bonitas, espectaculares, diferentes e que apostan pola sensibilidade ambiental", resolveu.
"Hai uns anos poderiamos dar unha resposta concreta, pero agora mesmo as rebaixas comezan o día 1 de xaneiro e terminan o 31 de decembro. Isto o descontrola todo. Ao consumidor, as compras, as vendas", dixo á prensa Seijas, quen polo menos confía en que o Nadal se note", "sexa unha campaña similar á do ano pasado e que se poida vender un pouquiño".
