Os tres parques lucenses que miran cara ao río —a Rosalía de Castro, os Marcos Cela e o Miño— non estarán unidos por pasarelas, como propuxo no pleno o grupo municipal do PP, botando man dun anteproxecto antigo que fora encargado no seu día polo Concello. A comunicación do centro da cidade co río a través de zonas verdes e dúas pasarelas desde a chaira do Pavillón dos Deportes ata a Volta da Viña foi este xoves rexeitada polo equipo de goberno local alegando que, segundo consultas a técnicos, esas pasarelas suporían un impacto visual e ambiental.
"Antes de facer unha proposta así deberiamos asegurarnos se é viable. Este proxecto supoñería a instalación de ascensores, cun grande impacto visual, polo que correriamos o risco de cargarnos o parque. Polo que non se poden matar moscas a cañonazos. Hai que mirar primeiro o impacto visual e medioambiental que causaría iso", explicou o edil de medio ambiente, Miguel Fernández
A proposta do PP pretendía que se unise o Parque Rosalía de Castro co Miño a través de dúas pasarelas, de 50 metros, desde o Pavillón dos Deportes ata o Parque Marcos Cela e desde aí ata a Volta da Viña.
O proxecto incluía dous pasos desde o Pavillón dos deportes ata a Volta da Vila e uniría o centro coas ribeiras do Miño
A idea contaba co apoio de Ciudadanos que expuxo, ademais, "que cando se fale de zonas verdes, mírese para o rural e dóteselle de servizos", indicou o concelleiro Juan Manuel Vidal Pardo.
Pola súa banda, o edil do PP Antonio Ameijide criticou o rexeitamento do equipo de goberno á proposta. "Hai que ter altura de miras e abandonar a estratexia de ser a oposición da oposición", dixo.
PATRIMONIO. Lugo será o primeiro Concello de Galicia en ter homoxeneizados, no seu plan de protección especial do recinto histórico (Pepri), os niveis de protección do patrimonio catalogado marcados pola Xunta.
A área de sustentabilidade urbana trasladou onte ao pleno a conformidade da Dirección Xeral de Patrimonio ás equivalencias realizadas polo servizo de arquitectura para harmonizar a normativa do Pepri coa lei autonómica. Segundo a alcaldesa, Lara Méndez, isto "permitirá abordar con maior dilixencia os procedementos urbanísticos que afecten a elementos arquitectónicos ou paisaxísticos nos que sexa obrigada a supervisión do ente galego".
