O grupo provincial do Partido Popular pediulle ao goberno da Deputación de Lugo que destine os fondos que ía gastar este ano en subvencionar a celebración de festas en distintos municipios da provincia a unha liña de axudas directas para as orquestras, dado que a maioría quedáronse sen traballo este ano por mor da crise do coronavirus.
O presidente da Asociación Galega de Orquestras, Manuel Fariña, recoñeceu á prensa que as contratacións caeron este ano “nun 99%”, como consecuencia da anulación da maioría das festas que ían celebrarse este verán.
Por iso, logo dunha conversación telefónica co propio Fariña, o portavoz do grupo provincial do PP, Javier Castiñeira, anunciou que “intentará” conseguir que a Deputación abra esa liña “de axudas directas” ás orquestras da provincia.
Os populares proporán que os fondos salgan da área de Cultura, que xestiona o BNG, concretamente das “partidas que o organismo provincial non poderá dedicar ás festas que apoia, porque están suspendidas pola crise sanitaria”.
Castiñeira recordou, nese sentido, que son moitos os lucenses que “conseguían unha gran parte dos seus ingresos” anuais do “traballo nas orquestras”.
