Un xestor catalán, con iniciais J.A.C.R., podería acabar en prisión por estafar a dous lucenses que pretendían abrir un negocio de hostalería no centro histórico. Tanto o fiscal como a acusación particular solicitaron este luns para o home unha condena de tres anos e nove meses de cárcere, así como que devolva os 10.890 euros que lles cobrou por unhas xestións que supostamente xamais chegou a realizar.
Os denunciantes explicaron este luns na Audiencia que hai catro anos, a principios de 2014, puxéronse de acordo para montar un bar na Rúa da Cruz coa intención de que o explotasen os seus fillos.
Como conseguir crédito nos bancos resultáballes complicado, un coñecido púxoos en contacto coa empresa do acusado, con sede en Barcelona, que se dedicaba a tramitar préstamos. Tras manter varias reunións, o xestor comprometeuse a obter unha garantía bancaria que amparase o crédito que solicitaban os lucenses.
Segundo argumentou o fiscal, o acusado díxolles que ía conseguir un crédito de 600.000 euros, a metade para pór en marcha o negocio e a outra metade para ingresar como aval na conta dunha entidade de crédito.
O acusado cobroulles 10.890 euros en concepto de honorarios e as partes asinaron un contrato. Con todo, tal e como apuntan as acusacións, o home "non conseguiu ningún crédito e tampouco acreditou desenvolver ningunha xestión para conseguilo, permanecendo o diñeiro que cobrou no seu patrimonio, o que evidencia a súa inicial intención fraudulenta encuberta baixo a aparencia de dilatada solvencia profesional".
O xestor -que só quixo responder as preguntas da súa avogada- asegurou no xuízo que realizou todos os trámites aos que se comprometeu. "Fixéronse xestións con varias entidades e finalmente preautorizouse a garantía bancaria. Para continuar coa operación, os clientes tiñan que enviarme a documentación do local e ademais tiñan que facer un seguro de cambio de divisas, xa que os trámites realizábanse cunha entidade con sede americana e o seguro era un requisito obrigatorio. eles nunca me enviaron os documentos e a operación non puido continuar por ese motivo", dixo.
Os denunciantes negaron esta versión e sinalaron que sempre falaron de operar en mercados europeos. "Meses despois, cando lle pedimos explicacións, díxonos que necesitabamos un seguro de cambio de divisas. Fomos aos bancos e dixéronnos que non era viable, que non se concedían en operacións deste tipo".
O avogado dos denunciantes apuntou que o acusado "é un pícaro que se serviu da necesidade da xente" e solicitou a súa condena como autor dun delito de estafa. O fiscal, pola súa banda, tamén considera que hai probas suficientes para condenalo. "Negouse a contestar ás preguntas das acusacións e máis vale que non declarase, xa que tería que responder a cuestións moi comprometidas", resolveu.
