Finalmente o ministerio fiscal retirou os cargos contra este último e solicitou para o outro procesado tres anos de prisión por un delito de lesións e que durante catro anos non se aproxime a menos de 500 metros da vítima, nin se comunique con ela. Esa pena privativa de liberdade sería substituída pola expulsión do país e a prohibición de regresar a España durante seis anos. Ademais, reclama unha indemnización de 860 euros e que abone ao Sergas 1.106 euros en concepto de gastos pola asistencia sanitaria prestada ao ferido.
O xuízo, no que prestaron declaración unha ducia de testemuñas, durou máis de tres horas.
A liorta tivo lugar ás cinco da madrugada do 1 de agosto de 2015 na céntrica Rúa Clérigos, unha das zonas de movida da capital lucense.
RIÑA TUMULTARIA. A vítima dispúñase a entrar nun pub, xunto aos amigos cos que estaba a celebrar unha despedida de solteiro, cando se produciu un multitudinario boureo ás portas do establecemento de lecer nocturno. Saíron entón do interior do local varias persoas, unha delas, o acusado, que rompeu dous vasos e que presuntamente lle asestou dous cortes con eles á vítima.
O agredido asegurou que o seu grupo de amigos era alleo á rifa tumultuaria que se produciu ás portas do pub. Engadiu que comezou a sangrar copiosamente polo pescozo –precisou 12 puntos de sutura e quedoulle como secuela unha cicatriz de tres centímetros e medio–. Entón a súa cuadrilla alertou aos servizos de urxencias sanitarias e á Policía Nacional. Dixo que se afastaron do batifondo e que se dirixiron á Porta de Santiago para esperar á ambulancia.
A vítima asegurou así mesmo que o agresor e os seus acompañantes perseguíronlles rúa abaixo cando se marcharon e que lles arroxaron vasos e botellas, actitude agresiva na que non cejaron ata que acudiu ao lugar unha patrulla policial.