Tres feridos graves é o balance dun choque frontal entre dous coches que se rexistrou sobre as catro e media da tarde deste domingo no quilómetro 83,5 da estrada N-640, á altura da parroquia lucense de Teixeiro.
Aínda que a Garda Civil de Tráfico aínda investiga as causas do sinistro, todo fai pensar que a colisión se produciu como consecuencia dunha manobra de adiantamento dun dos vehículos implicados, un Ford Focus e un Renault Scenic, xa que se rexistrou nunha recta con boa visibilidade.
Varias ambulancias do 061 acudiron ao lugar do accidente para auxiliar ás tres persoas feridas, unha delas cunha perna rota, e trasladalas ata o Hula. Foi ademais necesaria a intervención dos bombeiros de Lugo para axudar á excarceración dos feridos.
A Garda Civil de Tráfico viuse obrigada a cortar a estrada durante un tempo e habilitar un desvío alternativo dos vehículos que transitaban durante os labores de asistencia aos feridos e mentres non eran retirados polos guindastres os dous vehículos sinistrados.
