Un mozo de Lugo foi asaltado por dúas persoas, sen aparente relación entre elas, no mesmo lugar da cidade e en cuestión de minutos, segundo informou o Corpo Nacional de Policía, que identificou e imputado aos dous supostos autores deses roubos con intimidación, un deles menor de idade.
Os feitos sucederon o pasado 26 de xaneiro, sobre as cinco da madrugada, na contorna da Catedral de Lugo, unha das zonas de movida nocturna da cidade.
A vítima atopábase en compañía dun amigo cando, de súpeto, achegáronselle outros tres mozos e un deles intimidouno para que lle dese o diñeiro que levaba encima.
Practicamente no mesmo instante, outro rapaz, neste caso menor de idade, diríxese aos dous amigos e pregúntalles se algún deles leva teléfono móbil. Como a vítima o tiña na man, arrebatoullo e marchou con el.
Tanto a vítima como o seu amigo saíron polo arco da Muralla que dá á rúa Santiago, onde atoparon a unha patrulla da Policía Nacional das que forman o dispositivo de vixilancia de zonas de lecer nocturno os fins de semana.
Cando lle contaron o sucedido aos axentes, estes deron aviso aos seus compañeiros e, pouco tempo despois, policías que ían nun coche camuflado interceptaron ao mozo que se levou o teléfono.
A vítima interpuxo a correspondente denuncia en dependencias policiais e o menor foi imputado por roubo, quedando máis tarde a disposición dos seus pais, aínda que as dilixencias están en mans do Ministerio Fiscal.
Este luns, os axentes encargados do caso completaron a investigación coa identificación e a localización do rapaz que roubou o diñeiro.
As dilixencias neste caso quedaron en mans da autoridade xudicial.
