Os traballadores que prestan os seus servizos no centro de día Antonio Gandoy de Lugo teñen que levar ás veces toallas e xabóns para o aseo dos usuarios con autonomía limitada, debido a que a empresa adxudicataria "non sempre" lles facilíta estes produtos de hixiene persoal.
Este é un dos "posibles incumprimentos" da concesionaria que denunciou o secretario de organización de CC.OO, Manuel Quiñoá, nun escrito presentado no Concello de Lugo, no que propón a rescisión do contrato.
Apunta tamén que o transporte ao mediodía de luns a venres realízao só unha gerocultora, cando o prego de condicións do contrato establece que debe levar un acompañante, e que non cobre as ausencias de persoal.
Este sindicato indica ademais que a adxudicataria debe unha nómina ao persoal e que lle comunicou que tampouco poderá facer fronte á deste mes porque o Concello aínda non pagou o primeiro trimestre.
Desde o goberno local aclárase que é un problema contractual entre a adxudicataria e os traballadores porque o prego establece que a empresa debe ter a "solvencia" económica necesaria para facer fronte ás nóminas, aínda que se demoren os pagos do Concello.
O Concello ten que refacer o prego do contrato, tras prosperar ante o TACGal o recurso da patronal do sector
Asegura ademais que a administración local fixo "varios requirimentos" á concesionaria por incumprir algúns requisitos, aínda que precisa que iso non é suficiente para a rescisión do contrato porque a empresa está a prestar o servizo.
CONCURSO PARALIZADO. Estaba previsto que a mediados deste mes finalizase o prazo para que as empresas interesadas presentasen ofertas para xestionar este centro de día. Pero ese procedemento paralizouse por mandato do Tribunal Administrativo de Contratación Pública da Comunidade Autónoma de Galicia (TACGal), por mor de prosperar o recuso presentado pola Asociación de Empresas de Servizos para a Dependencia contra algunhas das cláusulas sociais incluídas.
O Concello prevé ter finalizado o novo prego a próxima semana para volver sacar a concurso o servizo.
