O PP cre que o carril bici é un perigo na Volta da Viña. O goberno quere canalizar o paso de bicicletas por un punto negro para o tráfico en Lugo, no que hai accidentes de forma habitual, advertiu o viceportavoz da formación, Antonio Ameijide.
O edil reclamou que se redeseñe o trazado da senda ciclista nese punto, para evitar riscos a ciclistas e condutores, xa que a pretensión do goberno é levar o carril bici pola cuneta da Volta dá Viña, eliminándoa e cubríndoa con caixas drenantes nun punto no que a sucidade pode tupir a estrutura e onde hai un noiro inestable, no que se producen regularmente desprendementos, dixo.
O goberno local, en tanto, acusou aos populares de crear "alarmismos infundados" e remarcou que, dado que a senda ciclista discorre xunto ao noiro, contémplase crear un sistema de drenaxe, que irá por baixo do carril bici, como solución á escorrentía que presenta a zona. Iso evitará, sostén, que se xeren situacións de perigo nesa vía.
Pero os populares están convencidos de que a auga acabará correndo por encima do pavimento, facendo que sexa aínda máis deslizante. Ameijide cre que se xerará un perigo engadido nunha zona que é xa de risco.
Opinou que o sistema de caixas drenantes pode ser útil noutras zonas da cidade, pero non nese punto, onde agora mesmo se pode apreciar como follas e terra caen cara á cuneta, recordou.
O goberno ve un alarmismo sen fundamento e acusa ao PP de intentar preocupar aos veciños sen sequera haberse molestado en preguntar aos técnicos pola solución que se buscou para ese tramo do carril bici, que, recordou, non está concluído e faltan aspectos como a sinalización.
Pasarelas. O PP retomou a proposta de crear unha serie de pasarelas que enlacen co río e polas que podería ir o carril bici. O goberno local rexeitou esa proposta argumentando que non é viable, con todo, Ameijide dixo que o proxecto está no Concello e Arroxo exhibiuno durante a campaña electoral.
