Sanidade convocará a máis dun centenar de traballadores de hostalería do centro de Lugo logo de detectar un pequeno gromo vinculado a un dos establecementos. Trátase de poucos casos, entre os que se inclúen polo menos un traballador e varios clientes.
A citación empezou a facerse este mércores, pero continuará este xoves e está previsto que se chame a persoal que traballa en locais da zona de Campo Castelo, así como os de San Pedro, Nóreas, Rúa da Raíña, Teatro e San Marcos. Trátase dunha medida que ten un carácter fundamentalmente preventivo, co obxectivo de detectar asintomáticos entre os convocados que poidan estar a abrir novas cadeas de transmisión sen decatarse. Faise tamén coa intención de observar a situación na que se atopa a cidade de Lugo nun momento no que, ao non haber moitos gromos declarados e todos de tamaño pequeno, tense moita capacidade diagnóstica.
Se se achasen positivos nese cribado podería estenderse a todo o sector no municipio de Lugo nos próximos días
É unha decisión similar á que se tomou no seu momento no barrio de Montirón, onde tamén un gromo de pequena envergadura, de menos de dez casos, propiciou un cribado de 250 veciños. Nesa ocasión optouse por esa convocatoria porque se estimaba que a interacción dos residentes do barrio era grande polo que se podían abrir novas cadeas noutras vivendas. A inmensa maioría dos convocados acudiron a que se lle tomase unha mostra para PCR no covidauto do Hula e, de feito, dos 250 citados asistiron 230.
Non se atopou ningún positivo entón, pero, con posterioridade, unha persoa que fora convocada e decidiu non acudir —hai que recordar que estes cribados son voluntarios e non requiren que as persoas se aislen ata coñecer o resultado da proba— resultou ser positiva. Pouco despois do cribado empezou a presentar síntomas e entón si se lle fixo unha PCR que mostrou que tiña covid.
No caso da hostalería, se non se atopan positivos o cribado limitarase a esas zonas. Se pola contra detéctanse novos casos podería estenderse á hostalería de toda a cidade.
