A Rúa da Raíña, unha das principais arterias comerciais da cidade, é este verán escenario de dous novos peches. O primeiro deles tivo lugar este luns de forma sorpresiva, cando Inditex anunciou aos traballadores de Pull and Bear que a actividade se detiña, que os contratos temporais cesaban e que aos indefinidos ofrecíaselles a posibilidade de trasladarse á tenda do centro comercial de Marineda, na Coruña. Esa comunicación fíxose pouco logo da hora de apertura do comercio. Por outra banda, está previsto tamén o peche de Amichi, outro comercio de moda moi próximo a Pull and Bear. Non transcendeu que día acabará a súa actividade, pero o local no que se atopa, no número 14 da Raíña, púxose en aluguer e, de feito, xa ten novo inquilino.
A marcha destes dous establecementos supón unha nova baixa no considerado ata agora quilómetro cero do comercio lucense. Os peches producíronse tamén noutras rúas próximas, desde Santo Domingo ata San Pedro e en establecementos de distintos sectores, pero resultan especialmente visibles na Raíña. E, aínda que se insiste nas dificultades do pequeno comercio para manter a súa actividade fronte ás grandes cadeas, o certo é que tamén afectan a estas.
A pesar de que Inditex segue mantendo varios locais no centro da cidade, o peche de Pull and Bear súmase ao
Neste caso, a decisión de pechar Pull and Bear non se comunicou aos traballadores ata que xa era unha realidade e supón a desaparición dun comercio moito máis veterano na Raíña, con traballadores con moita antigüidade, algunha incluso con máis de vinte anos de vinculación laboral coa empresa.
CATRO. As traballadoras cun contrato indefinido son catro e, segundo explicou este luns Asun Castiñeira, da federación de Servizos da CIG, enfróntanse agora a dúas opcións. A primeira sería aceptar o traslado ao centro comercial coruñés, onde empezarían a traballar en setembro. A segunda é renunciar ao contrato por un cambio substancial das condicións de traballo, xa que se non se lles dá a posibilidade de seguir exercendo en Lugo. Pull and Bear mantén aberta unha tenda no centro comercial das Termas, onde non cambia a situación dos traballadores.
Polo momento, o persoal atópase nunha situación de licenza retribuída, na que non ten a obrigación de acudir ao seu lugar de traballo xa que este xa non se atopa operativo, pero segue percibindo o seu salario.
O anuncio de que a tenda pechaba supuxo un verdadeiro xerro de auga fría para o persoal, que ao contrario do que ocorrera co persoal de Oysho que si contemplaba esa posibilidade, non se esperaba esta medida. Na comunicación que se entregou ao persoal atribuíase a decisión a unha mera reorganización do traballo, aínda que de viva voz achacouse a que a afluencia de clientes diminuíra nos últimos meses.
O peche do Pull and Bear por parte de Inditex súmase ao de Oysho, da mesma cadea, que se produciu no principio do ano
A tenda permaneceu este luns durante toda a mañá iluminada e co persoal no seu interior, empaquetando roupa e facendo caixas. Algúns dos traballadores que non tiñan quenda de mañá senón que debían acudir a traballar pola tarde foron convocados por teléfono para botar unha man. Desa mesma forma comunicóuselles a nova situación na que se atopaba a tenda.
O comercio recibiu tamén a visita de numerosos clientes, que se viron sorprendidos polo enreixado baixado e o cartel que lucía na fronte do escaparate, no que se comunicaban que, a partir de agora, serían atendidos na tenda do centro comercial das Termas.
Algunhas fontes achacan a decisión deste peche e do de Oysho que tivo lugar no principio do ano ao interese da empresa de desfacerse dos alugueres máis céntricos e custosos, centrándose na súa actividade nos centros comerciais, onde o custo dun local é moito menor, e na venda online, unha parte do negocio na que está a facer grandes avances, ofrecendo incluso reparticións dentro do mesmo día nalgunhas cidades.
