A porcentaxe de positivos nas PCR que está a realizar o Sergas na provincia de Lugo baixou nos últimos días e aproxímase ao 5%, a porcentaxe indicada por Organización Mundial da Saúde (OMS) para dar por controlada a pandemia, segundo informou a Efe o xerente da área sanitaria de Lugo, A Mariña e Monforte de Lemos, Ramón Ares.
“Iso non quere dicir que o consigamos”, recoñeceu Ares, porque “en calquera momento pode xurdir un rebrote” e a situación pode complicarse de novo, polo que fixo de novo un chamamento “ responsabilidade” persoal e á atención permanente ás medidas de prevención fronte ao Covid-19.
"É certo que a situación vai mellorando, hai menos casos activos e menos positivos diariamente, a pesar de que estamos a realizar un número importante de probas PCR", dixo Ares, pero iso non implica que "poidamos relaxarnos".
De feito, recoñeceu que é "preocupante" a situación nas residencias da terceira idade, concretamente en Outeiro de Rei e O Incio, porque os usuarios son "persoas fráxiles", maiores e con múltiples patoloxías, o que fai que "a mortalidade sexa máis alta".
De feito, Ramón Ares precisou que a mortalidade é superior nesta segunda "onda da pandemia" precisamente porque na primeira "non había incidencia nas residencias".
O último falecemento foi confirmado este domingo, a última hora da tarde, unha muller de 85 anos que estaba ingresada no Hula e procedía da residencia de Outeiro de Rei.
Con este último deceso, xa son 81 as persoas falecidas en Lugo polo Covid-19 desde que comezou a pandemia.