A Xefatura Provincial de Tráfico de Lugo retomou este xoves os exames para recuperar ou obter o permiso de conducir, unhas probas aprazadas polo estado de alarma que, segundo estiman as escolas, deixou en espera a uns 300 lucenses. A presidenta do sector na provincia, Mónica Pérez, afirma que a volta á normalidade —cos novos protocolos de hixienización e limpeza— foi "moi ben recibida" polos alumnos, que desde o pasado luns tamén poden recibir clases prácticas.
Esta volta á rutina realizarase de forma gradual e Tráfico optou por priorizar os exames teóricos daqueles condutores que teñen declarada a perda de vixencia e os de mercancías perigosas. Estas son as únicas probas que arrincaron este xoves, aínda que o resto dos futuros condutores non terán que esperar demasiado, xa que o vernes se retoman o resto dos exames teóricos na xefatura de Lugo, aos que seguirán a próxima semana os realizados nos centros de Foz e Monforte.
Pola súa banda, as probas prácticas en circuíto pechado recuperaranse ao longo da próxima semana e, segundo o calendario publicado por Tráfico, comezarán o
As probas teóricas arrincaron este xoves cos exames de recuperación de puntos e de mercancías perigosas. Este venres retómase o resto
Desde a xefatura provincial de Lugo sinalan que xa se transmitiron ás autoescolas todas as instrucións necesarias para a presentación de solicitudes, "nas que se aposta pola tramitación telemática, tanto para evitar desprazamentos innecesarios e minimizar os riscos, como para axilizar o servizo".
Igualmente, insisten na importancia do uso de luvas e máscara en todas as probas e espazos establecidos na normativa sanitaria, así como a de utilizar o xel hidroalcohólico e manter a distancia interpersoal. "É moi importante que se utilicen para a espera as zonas indicadas, gardando no posible unha distancia mínima de 2 metros coas demais persoas presentes. Polo mesmo motivo, non estará permitida a presenza de persoas que non teñan unha relación directa coa realización das probas", explican.
A presidenta da Asociación Provincial de Autoescolas de Lugo, Mónica Pérez, explica que o sector tamén conta cun protocolo de hixiniezación e limpeza, "para ofrecer unha garantía total aos alumnos". De momento, xa son moitos os que retomaron as clases, aínda que prevén que a demanda aumente cando finalicen os exames da Abau. "Moitos alumnos de bacharelato deciden obter o carné de conducir cando finalizan as probas, e como este ano se atrasaron", comenta Pérez, "tamén teñen que atrasar o inicio na autoescola".
Os exames prácticos en circuíto pechado comezan a próxima semana en Foz, Lugo e Monforte, e os de circulación o 8 de xuño
Desde a Xefatura Provincial de Tráfico agradecen "o esforzo e compromiso" das autoescolas, as asociacións do sector e os alumnos "para implementar e cumprir estritamente e durante todo o tempo que sexa necesario os protocolos de reactivación, que contemplan as medidas de hixiene, desinfección, distanciamento interpersoal e organización precisos para realizar os exames con toda a seguridade posible".
Así mesmo, a xefatura fixo fincapé no esforzo realizado polas autoescolas e polos concellos de Foz e Monforte, "para manter os seus centros de exame nas mellores condicións de servizo e desinfección", o que permitiu volver poñer en marcha desde o principio as probas en ambas as localidades. Tal e como explica Mónica Pérez, os exames en Lugo realízanse en instalacións da DXT, pero en Foz e Monforte desenvólvense en locais cedidos polo Concello.
"Os examinadores foron inspeccionar esas instalacións antes dos exames e comprobaron que cumprían todas as medidas de limpeza e hixienización requiridas, así como as limitacións de aforamento e de distancias, polo que os residentes do sur de Lugo e da costa poderán examinarse nas súas zonas".