O PAC de Fingoi sufriu este domingo unha nova pedrada, a terceira en menos dun mes. A pedra entrou por unha fiestra da sala de espera, que se atopaba chea de xente nese momento. Non golpeou a ninguén, pero podería causar feridos, lamentábase unha sanitaria, que denunciaba que "pasamos de que nos aplaudan a que nos tiren pedras".
A Policía acudiu ao aviso do centro de saúde tras esa nova agresión, pero non localizou ao agresor, ao que tampouco puideron chegar a ver os traballadores da PAC. A situación fixo que se estendese a sensación de impotencia entre o persoal do centro, xa de seu esgotado tras dous anos dándoo todo pola pandemia.
O centro de saúde non ten cámaras de seguridade nin servizo de vixilancia privada e as pedras —durante o último mes houbo un día no que tamén lles lanzaron un pau— viñeron a colmar o vaso da paciencia dos traballadores, que denuncian que sofren continuas agresións verbais e berros dos pacientes.
"A xente está rebotada, pero nós levamos dous anos ao pé do canón", dicía unha traballadora, cansada de soportar os malos xeitos, cando non as agresións verbais, de pacientes. Os xestos de mala educación multiplícanse e chegan de usuarios de todas as idades e condicións, contaba.
Moitos perden os nervios porque consideran que deben esperar demasiado tempo a ser atendidos e unha traballadora do centro de saúde recoñecía que este domingo había que agardar ata tres horas.
Pero non había forma de paliar esa demora porque houbo unha avalancha de pacientes. Acudiron este 2 de xaneiro a Fingoi centos de persoas e aínda que é unha PAC non todas ían por unha urxencia médica. En lugar de acudir a Sanidade, onde está habilitado o centro de realización de test de antígenos, moita xente acudiu ao centro de Fingoi para que se lle fixese a proba.
"Non damos abasto", dicía unha sanitaria, que dicía que era inevitable que a xente tivese que esperar ante a avalancha de pacientes, iso a pesar de que se reforzaron os equipos e este domingo había catro médicos e catro enfermeiras traballando, ademais doutros tantos profesionais no servizo de administración. Trátase de dous equipos máis dos que hai a diario e un máis dos habituais durante os fins de semana.
Ese reforzo quedou lonxe de ser suficiente para atender a unha auténtica avalancha de pacientes. E aos que chegaban á PAC había que sumar as asistencias domiciliarias que houbo que atender, explicaba unha sanitaria.
Houbo urxencias, pero o groso dos usuarios aos que se atendeu eran persoas que querían saber se tiñan covid. E moita xente estaba a dar positivo, mentres que outros, confesaban os sanitarios, acudían para descartar a enfermidade.
Tras a pedrada, o desánimo acabou por estenderse definitivamente entre os traballadores, algúns dos cales se lamentaban da falta de responsabilidade de moitos cidadáns.
A pesar do tempo de pandemia transcorrido, queixábanse, hai aínda xente que ignora as normas elementais, como usar a máscara, gardar a distancia de seguridade con outras persoas ou limitar os contactos a grupos burbulla. Moitos sáltanse as normas e atacan "aos que estamos a salvar a situación", dicían.
As normas do covid esixen asegurar a ventilación, de modo que a PAC mantén abertas fiestras, pero onte estaba aberta en batiente. Iso supón que o agresor tivo que facer o lanzamento desde moi preto e con bastante forza. Logrou o obxectivo de causar inquietude, pero ningún dos pacientes que estaban na sala resultou ferido.
O persoal do centro tampouco logrou ver ao agresor, que debía ser alguén novo porque fuxiu con rapidez. Tampouco saben se o obxectivo é meramente vandálico ou se actúa máis dunha persoa.
