A aparición de varios preservativos usados no aparcadoiro municipal do antigo seminario menor, que desde hai meses abre ao público fóra do horario de oficina, constata que este céntrico estacionamento está a ser xa usado por algunha parella como picadeiro.
Funcionarios e políticos que utilizan habitualmente este aparcadoiro sorprendéronse da aparición dos preservativos, que serían usados durante a fin de semana aproveitando que durante os sábados e domingo o horario de apertura ao público é máis amplo e chega ata as doce da noite.
A partir desa hora, as portas do aparcadoiro péchanse de forma automática, polo que desde ese momento a única forma de entrar ou saír co vehículo é usando o mando a distancia que se lles proporciona aos políticos e funcionarios municipais.
A aparición de preservativos non é única polémica que viviu este aparcadoiro, xa que desde antes da súa apertura ao público houbo persoas que denunciaron que os mandos a distancia estaban a ser utilizados por persoas alleas ao Concello, algo que aínda estaría a ocorrer, segundo indican algúns usuarios. Ademais, desde a apertura ao público, a Policía Local reforzou a vixilancia do aparcadoiro e incluso chegou a multar vehículos de políticos e funcionarios que non tiñan visible o permiso no coche durante horario de oficina.