O goberno de Lara Méndez informou na mañá deste martes de que estuda, en coordinación cos técnicos da Xunta, alternativas para continuar adiante coa instalación da plataforma de baño no río Miño, que segundo o plan inicial debía estar en funcionamento o 15 de xuño.
A colocación dos pantaláns flotantes comezou con algo de atraso debido á fabricación das pezas e leva días parada, por falta de material pero, sobre todo, porque a Xunta sinalou nun informe a existencia de posibles problemas de seguridade, por falta de calado e polo risco que suporía a corrente en caso de choiva forte, e ambientais, xa que hai unha importante colonia de mexillóns de río, unha especie protexida.
As alternativas que baralla o goberno local é trasladar os mexillóns ou desprazar uns metros a instalación, para superar o suposto problema de profundidade, mentres que o goberno comunicou este martes que xa se dispón do material que faltaba.
O proxecto da zona pública de baño contempla a instalación de catro piscinas, con distintas profundidades, augas arriba da Tolda. Segundo a autorización concedida pola Confederación Hidrográfica do Miño-Sil, a instalación pode funcionar durante 25 anos desde o 15 de xuño ata o 15 de setembro, data na que deberá ser desmontada.
