Fíxose de rogar pero xa está en servizo. A nova ponte de Paradai que comunica os barrios lugueses do Sagrado Corazón e As Gándaras con Duquesa de Lugo entrou este mércores en funcionamento logo de ser recibidas por parte da Xunta unhas obras que sufriron varias paralizacións e atrasos, pero que consuman unha vella aspiración, desatascar o tráfico de entrada a Lugo a través da ponte da estación de ferrocarril.
A apertura ao tráfico do novo viaduto, que supuxo un investimento de 3,5 millóns de euros por parte da Xunta, mentres que o Concello achegou os terreos, pillou por sorpresa a moitos condutores e peóns que paseaban na tarde deste mércores pola contorna.
A obra forma parte do plan Paradai, un dos proxectos aprobados nos seus postrimerías no último goberno local do PP, é dicir, hai 16 anos.