MOITOS NENOS lucenses entregaron este sábado as súas cartas a Papá Noel nunha carpa instalada na Rúa da Raíña grazas a unha iniciativa de El Progreso de Lugo, o Concello e a asociación de comerciantes Lugocentrum, coa colaboración de Audicenter Lugo, Perfumerías Arenal, Vegalsa-Eroski e Óptica La Torre.
Desde as catro e ata as oito da tarde, os pequenos que acudiron á cita tiveron a oportunidade de falar con Santa e de fotografarse con el para levar un recordo. Ademais, recibiron diversos obsequios doados polas empresas colaboradoras.
O evento tamén tiña como obxectivo fomentar os hábitos de redacción entre os nenos lucenses, propóndolles que presentasen as súas cartas do xeito máis orixinal posible.
Así, de entre todas as cartas recollidas ao longo dos dous últimos días, un xurado seleccionará os gañadores en tres categorías: infantil, que comprende aos nenos de ata 3 anos; a junior, cos de 3 a 6 anos de idade, e a senior, para os participantes de máis de 6 anos.
As misivas máis orixinais recibirán sendas cartóns de agasallo por valor de 100 euros, que poderán gastar nos establecementos asociados a Lugocentrum. A proposta de El Progreso, Concello de Lugo e a asociación de comerciantes do centro histórico pretende revitalizar o comercio de proximidade no centro da capital lucense e colaborar ao mesmo tempo coa celebración do Nadal.