O reaxuste que tivo que facer o Concello de Lugo no servizo de comedor escolar como consecuencia da pandemia afectará a 350 nenos da capital. A maior parte dos escolares que non poderán acudir ao comedor do colexio este ano, uns 300, son os que usaban o servizo de xeito esporádico, segundo detallou a concellaría de educación.
Boa parte deses menores que acudían de forma descontinua ao comedor son fillos de persoas que traballan a quendas, de modo que hai días que poden ocuparse dos seus fillos á hora da comida, pero outros días necesitaban deixalos no comedor para poder acudir aos seus postos de traballo. Entre os fixos, os que acudían todos os días da semana ao comedor, son 50 os nenos que este ano non disporán dese servizo, segundo os datos da concellaría.
A necesidade de facer axustes nos comedores, para respectar as distancias de seguridade, obrigaron ao Concello a reducir as prazas que ofrece nos comedores escolares. O Concello estableceu un baremo para determinar que nenos mantiñan o dereito ao comedor. No caso de empate, as prazas dábanse mediante sorteo.
A situación xerou malestar nas familias e en centros como a Anexa os pais reclaman que se busquen espazos alternativos, xa que no centro quedan sen comedor uns 25 dos cen usuarios que había. O Concello xa estableceu dúas quendas de comida para poder ampliar as prazas de comedor, pero aínda así hai que limitar o número de usuarios por seguridade, di.
