A pandemia, moi especialmente a primeira parte na que houbo un confinamento obrigatorio e na que a interacción se reduciu ao mínimo, ten e terá profundos efectos na saúde mental e psíquica de moita xente. A Afalu (a Asociación de Familiares de Persoas con Alzhéimer de Lugo) preocúpalle moi especialmente a dos coidadores.
"Temos un problema de soidade non elixida. A este asóciase moita patoloxía de depresión e enfermidades neurodexenerativas. Ao non socializar, ante a falta de estímulo social, increméntanse. Este é un problema frecuente entre coidadores de persoas con alzhéimer, moitos dos cales viven no medio rural. Antes da pandemia recibían visitas de familiares os fins de semana, por exemplo, e despois iso acabouse. Son persoas dedicadas ao coidado deses enfermos, que é unha tarefa que exercen 7 días á semana e 24 horas ao día, que moitas veces non poden durmir polas noites. é unha situación moi dura", explica Iria Franco, vicepresidenta e coordinadora de Afalu.
Por ese motivo, as actividades programadas pola asociación este mes en torno ao Día do Alzhéimer, que se celebra o 21, están orientadas cara á prevención. O obxectivo é que a poboación en xeral e moi especialmente os coidadores dos enfermos saiban que hábitos axudan a atrasar a aparición ou o desenvolvemento de demencias e outras patoloxías neurodegenerativas. "Entre o 60% e 70% destas enfermidades poden retardarse ou incluso evitar que aparezan se leva unha vida saudable", explica.
Puntualiza que existe "moita confusión" sobre que implica necesariamente ese estilo de vida e recorda que saír a dar un paseo non é facer exercicio. Os novos hábitos deben empezar pronto e ser consistentes, mantelos no tempo. "Non se trata tanto de actuar cando che suba o colesterol como de seguir unha alimentación saudable e xa de evitar algo así", explica.
O coidado da saúde cun enfoque preventivo e tamén da saúde mental están presentes nas actividades deseñadas para este mes. Por exemplo, Franco destaca as accións formativas que a asociación leva a cabo con distintos profesionais e en diferentes puntos da provincia. Entre outras, abordarán o coidado de persoas con demencias, o día 23 en Friol. e o autocuidado do coidador ese mesmo día en Pedrafita.
O 27 e 28, a terapeuta ocupacional de Afalu mostrará cal debe ser a adaptación do fogar dunha persoa con alzhéimer a través dun taller online. Para anotarse débese escribir un correo [email protected]. O propio día de concenciación da enfermidade, o 21, haberá un taller de reanimación cardiopulmonar nas instalacións de Lugo.
Tamén está previsto facer un taller de mindfulness os días 20 e 27 en Begonte. Os días 22 e 29 de setembro en Outeiro de Rei terá lugar esa mesma actividade.
O obxectivo último é promover os hábitos saudables e que, dese xeito, contribuír a frear as enfermidades neurodegenerativas. Facilitar o coidado e a socialización dos coidadores é outra das metas.
Estarán colocadas fronte ao multiusos da Xunta, a Deputación Provincial e o Concello. Nelas, ademais de explicar cuestións da enfermidade, recolleranse donativos e informarase dos recursos que ofrece a asociación en Lugo.
170 son as persoas ás que Afalu axuda en unidades terapéuticas, centros de día, envellecemento activo, grupos de familias, talleres de memoria ou apoio psicolóxico.
