A pandemia tivo un forte impacto en negocios de Lugo e tamén levou por diante o centro de lecer infantil Galwy, que pechou 6 anos logo da súa inauguración. A súa xerencia decidiu o peche definitivo desta referencia para os máis pequenos antes do estado de alarma, un proceso que se viu acelerado pola negativa da entidade propietaria do local a rebaixar o aluguer.
"Pechamos definitivamente a finais de maio, xa que non sabiamos cando podiamos abrir nin as condicións nas que poderiamos facelo. Somos un centro pequeno e cun aforamento reducido era moi difícil traballar", asegura Hugo Lozano, un dos xerentes.
A administración da empresa é compartida por catro socios que se viron na tesitura de facer fronte a unha dos puntos que reflectía o seu aluguer. "Tiñamos un contrato de aluguer de 10 anos, e hai unha cláusula que recolle que se non estabamos os 10 anos tiñamos que preavisar con 6 meses de antelación, se non nos cargarían unha indemnización. Non o fixemos, pero entendemos que é unha causa de forza maior. Aínda así nos cobraron as indemnizacións. Pagámolas e agora reclamarémolo porque asinamos o contrato de resolución como non conformes", remarca.
Hugo Lozano e os seus tres socios baixaron a persiana "cun pouco de pena e frustración porque levamos tantos anos remando os catro socios en San Roque. Esa parte do centro tiñamos pensado pechala nun futuro e centrarnos na outra parte da empresa, recoñece aínda que ao tempo advirte que nos estaba comendo o custo fixo do aluguer e non queriamos que todo o gañado no pasado perdésese agora", matiza.
CAMPAMENTOS. A empresa Galwy espera recuperarse do peche do seu centro de lecer coa xestión de varios campamentos de verán ou a piscina municipal de Castroverde. "A nosa empresa consta de varias áreas, unha delas era o centro de lecer. A outra parte confórmaa unha escola de tempo libre onde formamos a monitores desta modalidade e a xestión dunha serie de campamentos de verán da Xunta de Galicia", comenta Hugo Lozano.
A situación que viviu o centro de lecer Galwy repítese en toda a comunidade. "Estamos dentro dun colectivo que agrupa os centros de lecer infantil de Galicia. As escolas infantís e ludotecas foron obrigadas a pechar, pero teñen unha chea de axudas, pero o noso colectivo está esquecido".
