O ministerio fiscal solicita sendas penas de nove anos de prisión para un pai e un fillo acusados de vender tabaco de contrabando e traficar con droga. Ambos serán xulgados a próxima semana na Audiencia Provincial de Lugo xunto a outros catro homes, que afrontan penas de entre dúas e medio e cinco anos de cárcere por fornecerlles os paquetes para a súa distribución na provincia de Lugo.
Segundo reza o escrito de acusación do ministerio público, a principios de 2013, o acusado R.V.P. e o seu fillo D.V.P. dedicábanse "de xeito habitual e como único medio de vida" ao contrabando de tabaco na provincia de Lugo. Para iso, ambos contaban con varios provedores e cunha ampla carteira de clientes, que estaba formada «maioritariamente» por locais de hostalería.
Os acusados utilizaban supostamente unha linguaxe crave para comunicarse cos seus provedores e clientes e almacenaban a mercancía en locais que eran propiedade de terceiras persoas, alleas ao contrabando. O fiscal mantén que, "para evitar a responsabilidade penal", pai e fillo transportaban en cada viaxe unha cantidade de tabaco cun valor inferior a 15.000 euros (unhas sete caixas de tabaco, aproximadamente) e ademais puñan todos o bens que adquirían cos beneficios do contrabando a nome de familiares, "para eludir ser obxecto dunha investigación patrimonial".
O tabaco que recibían pai e fillo procedía de Andorra e Málaga e os seus principais provedores eran os acusados A.V.V. e A.N.G. A acusación cita tamén no seu escrito aos seus principais clientes, entre os que figuraban varios establecementos de hostalería da capital lucense, Sarria e Castro de Ribeiras de Lea.
A Garda Civil sorprendeu ao pai e ao fillo o 14 de xullo de 2013, cando circulaban pola A-6 nun turismo con strong <>2.499 paquetes de tabaco no maleteiro. Un dos provedores, A.N.G., foi arrestado tan só uns días máis tarde con 518 paquetes de tabaco no seu turismo. Os investigadores detiveron tamén ao outro provedor e a outros dous homes o 30 de outubro de 2014, cando montaron dous dispositivos de vixilancia na localidade leonesa de Portela de Valcarce e en Becerreá. Estas tres persoas, A.V.V., L.L.R.C. e A.C.S. viaxaban nun coche lanzadeira e nunha furgoneta que transportaba 25.120 paquetes de tabaco.
Os axentes descubriron tamén un laboratorio de elaboración de marihuana no domicilio dos lucenses.
Ampla clientela
Ademais de distribuír o tabaco en locais de hostalería, entre os clientes había un prostíbulo e ata unha librería.
